Quién somos

El 19 de setiembre de 2012 asentóse como asociación “Reciella: families pol asturianu”, un grupu de families que llevaben aconceyando y organizando actividaes de diferente tipu a lo llargo d’esi añu.

L’asociación naz ensin ánimu d’arriquecimientu y tien como oxetivos fundamentales la tresmisión interxeneracional del asturianu nel ámbitu social y familiar y la enseñanza, promoción y difusión de la llingua asturiana nes primeres edaes.

Asina les families qu’entamen l’asociación faenlo con neños y neñes que tán nes edaes comprendíes ente los 0 y los 6 años, no que na enseñanza reglada apaez venceyao a la Educación Infantil. A xuiciu de los miembros de l’asociación esta iniciativa ye especialmente necesaria por dos motivos fundamentales: per un llau la importancia que tienen estes edaes na tresmisión y deprendimientu de los idiomes, y en segundu pol vacíu llegal que presenta la non presencia de la Llingua Asturiana nel currículu d’Educación Infantil.

Pal cumplimientu de los sos oxetivos Reciella plantega diferentes acciones, ente les que tán la organización d’actividaes nes que la llingua vehicular seya l’asturianu, la realización y edición de materiales empobinaos al públicu infantil, o mesmamente la collaboración y convenios con otru tipu d’asociaciones, alministraciones o instituciones.

D’esta miente, y a lo llargo del branu, l’asociación vieno organizando un programa d’actividaes n’asturianu ente les que tuvieron cuentacuentos o talleres d’instrumentos y cocina. La bona acoyida de les mesmes per parte de les families y los rapacinos foi lo qu’animó a los organizadores a dar un pasu alantre pa constituir el grupu definitivamente como asociación.